ধুনীয়া ৰঙৰ নতুন পাহিৰ

ডেকা :        ধুনীয়া ৰঙৰ নতুন পাহিৰ

তুমি মোৰ পদুলীৰ কেতেকী ফুল

তাকেই দেখি ম‍ই ভোল যাঁও

গাভৰু :      কেতেকী নহও ম‍ই সূৰুজমুখী

পুৱাৰ সূৰুজ তুমি কত ৰহনৰ

তাৰেই আশাত ম‍ই নিশা কটাওঁ

ডেকা :        তোমাৰ চকুৰ বন্তি দেখি মোৰ

মনৰ চগা উৰে

গাভৰু :      তোমাৰ চগাকে সাবটিবলৈ

ম‍ই শলিতা জ্বলাওঁ

ডেকা :        মনৰ সাগৰখনি তোমাৰ জোৱাৰেৰে

থৌকি বাথৌকৈ উথলে

গাভৰু :      মনৰ আকাশৰে ৰামধেনুখনি

তোমাৰ জেউতিৰে উজলে

ডেকা :        মনৰ সাগৰখনে সোধে ৰামধেনুখনিক

কেতিয়ানি আকোৱালি লওঁ ?

দুয়ো :         আমি দুয়ো একেলগে জীৱনৰ ফুলনিত

মৰমৰ শেৱালী ফুলাও

( কথাছবি : ধুমুহা, ১৯৫৭ চন )
(ইউনিক'ডীয় ৰূপান্তৰ  → দীপা  ডেকা)