অ’ আয়ুব খান

[Bhupen Hazarika's songs and Lyrics:- O Ayub Khan]

অ’ আয়ুব খান আৰু ভূট্টোজান !

শিয়ালবা কোন আৰু সিংহ কোন ?

মদ্ গৰ্ব্বী হৈ

নুশুনো নুশুনো বুলি

দুটিমান নঙঠা সত্যকে শুন ৷

             সিদিনা আকাশত ওফৰা দেখিলোঁ

             দীঘল নেজীয়া তৰা

            শুনিলো জম্মুৰ মছজিদৰ

            মোনাৰ বাগৰি পৰা ৷

আনৰ নেলাগে নিজ মজহবকে

মৃত্যুৰ নিজে তই দিছ ভাবুকি

শান্তিৰ নামাজ কঢ়োতে কাশ্মীৰীক

কোৰাণ শিকাবিনো কি ?

        মোৰ ধৰ্ম্ম নিৰপেক্ষ আকাশত

        উৰিছে সহস্র ‘নেট’ বিমান

        ওফৰালে মাৰ্কিন অনুকম্পাৰে দিয়া

       তহঁতৰ চেবাৰ ‘জেট’ কিমান ?

মিছাৰ সদাগৰ চৌ এন লাইৰ

পাইছ হ’বলা মৰম বেথা

অতদিনে নুবুজিলি এবাসে বুজিবি

বগ হৈ লুভীয়া শৃগালৰ কথা ৷

       গফুৰ খাঁ আজাদে আজাদী আনিলে

       আজীৱন কাৰাগাৰ মানি ৷

      পাবত গজিলি আয়ুব ভূট্টো

       ভৰিৰ নেপাৱ পানী ৷

জাকীৰ, চাদিক, চাগলা, মিৰ কাচিন

নায়ক প্রগতি মানৱতাৰ

ধৰ্ম্মৰ মুখা পিন্ধি বিংশ শতাব্দীত

নেভাঙে গীৰ্জ্জা আম্বালাৰ ৷

        তোৰ বেটন্ জোকাৰি পেটন টেঙ্কেৰে

        দিল্লীত ফুৰিবৰ মন হেনো আছে

        লাহোৰৰ ইচোগীল খালৰ পাৰে পাৰে

        আমাৰ জোৱানহে টহলিছে !

তোৰ নিৰ্ব্বাচন নাই, নাই গণৰাজ

উপনিৱেশৰ তই ধ্বাসাৱশেষ

নাপাক্ যুক্তিৰে পাকিস্তানৰ

ৰাইজৰ মুক্তিৰো কৰিলি নাশ ৷

           একনায়কত্বেৰে দুদিনৰ ৰাজ পাই

           পাক্ স্বাধীনতাকো কৰিলি হৰণ

          ৱেলচ পাখটুন, পাঠান ওৱাজিৰ

          আফ্রিদি খাটাকে নলয় শৰণ ৷

আমাৰ দেশকে কাফীৰস্তান বুলি

জোকাবি আৰুনো কিমান ?

কোটি মুছলিম ভায়ে বাছি দিয়া

প্রতিনিধিৰেও চলে হিন্দুস্থান ৷

          আজিৰ যুগ মাথোঁ মানুহৰ যুগ

          চুকৰ ভেকুলীক দিওঁ ধিক্কাৰ

          প্রমত্ত অন্যায়-বক্ষত থিয় হোৱা

         শাশ্বত নীতিৰ হে জয় জয়কাৰ ৷

শুন্ শুন্ হেৰ’ শেষ কথা আয়ুব খাঁ

ভাৰত জয় কৰা এৰ উম্মীদ

আমাৰ মাজতে আছে হেজাৰ – বিজাৰ

নিৰ্ভীক বীৰ আব্দুল হামিদ !

(কলকাতা: ১০ অক্টোবৰ, ১৯৬৫ চন )

ইউনিক'ডীয় ৰূপান্তৰ - দিগন্ত শইকীয়া