অ’ বান্ধৈ তাঁতৰ শালৰ শিপিনী

অ’ বান্ধৈ তাঁতৰ শালৰ শিপিনী

অ’ বান্ধৈ ৰাধা নে অ’ ৰুক্মিণী

অ’ বান্ধৈ বিজুলীৰে চাৱনি

দেখি মনে ৰাইজাই কৰে ৷৷

                   অ’ বান্ধৈ হোজা- চহা ডেকা মই

                   ৰ’দত ঘামো-জামো ঐ

                   অ’ বান্ধৈ সজাওঁ-পৰাওঁ পথাৰ

                   মনে মোৰ কইনা বিচাৰে ৷৷

অ’ বান্ধৈ সোণখটোৱা ঢোলবিৰী

অ’ বান্ধৈ মিনাকৰা জোনবিৰী

অ’ বান্ধৈ যাচিবযে নোভাৰোঁ

মনে মোৰ কেনেবা কৰে ৷

                   অ’ বান্ধৈ একঠা যে আছে মাটি

                   অ’ বান্ধৈ তাকে ৰাখিম সাবটি

                   অ’ বান্ধৈ সঁপি দিম জীৱনটি

                   কেভে আৰু কাঢ়িব নোৱাৰে ৷৷

অ’ বোলোঁ শিপিনীয়ে চাইছে

অ’ বোলোঁ মিচিক্-মাচাক্ হাঁহিছে

অ’ বোলোঁ মোকে হেনো বৰিব

ক’লে মোক চকুৰে ঠাৰেৰে ৷৷

(গুৱাহাটী: ১৯৫৪ চন)

ইউনিক'ডীয় ৰূপান্তৰ - দিগন্ত শইকীয়া