নাটক - শোণিত কুঁৱৰী
[জ্যোতিপ্ৰসাদ আগৰৱালা]
চতুৰ্থ অঙ্ক
তৃতীয় দৰ্শন
[ৰাজআলি ৷ দুপৰীয়া ৷ ভালকৈ সাজি-পাৰি কুঁজী বেগাবেগিকৈ আহে ৷]
কুঁজী :- উস্ কটা ! ভাল সাৰি আহিলোঁ
! কোনোমতে আহিছোঁ ৷ মোক আকৌ কবলৈ হাক দিয়ে ! হে হে ! মই টেঙৰীয়ে হবলা হাৰডাল পায়েই
নোকোৱাকৈ থাকিম ? সেই কথা হব নোৱাৰে ৷ [অলপ ৰৈ ] আজি কটা, মোৰ দিনটোৱেই কিবা ভাল হবলা ৷পুৱাই মুকুতাৰ মালাধাৰ পালোঁ, মাকে
৷ এইবাৰ ৰজাক কৈ পটেশ্বৰী হমেই হম ৷ যদি হওঁ পোনেই চিত্ৰলেখীৰ মূৰ খুৰাই বাজ কৰি
দিম ৷ মই তাইক এশিকা শিকাম মাকে, বুঢ়ীমাকক চিনাহে নাই ৷ সদায় পেংলাইকৈ থকাৰ হোৰ
তুলিম ৷ [গালৈ চাই ] ভালকৈয়েতো
সাজিপাৰি আহিছোঁৱেই, ডিঙিত মুকুতাৰ মালাধাৰ আছেই ৷ চুলিকোচাও ভালকৈ মেলাই
আহিছোঁৱেই ৷মাকে, আজি ৰজাৰ মন খুৱাইহে এৰিম ৷ এতিয়া তামোল এখনকে খাই মুখখন ৰঙা কৰি
যাওঁ মাকে ৷ [তামোল খাই ] ই ...
সঁচাকৈয়ে মোৰ দেখোন কপালখন মুকলি হল একা ৷ সৌটো নাপিত আহিছে ৷ তাৰপৰা দাপোনখন লৈ
মুখখন ভালকৈ চাই লওঁ ৷ [নাপিতক ] হেৰৌ কটাৰ পো বন্দী নাপিত ! এইফালে আহ ৷ চাওঁ চাওঁ, তোৰ দাপোনখন দেচোন ৷
[নাপিত আহে ]
নাপিত :- ই বোলো, আমাৰ কুঁজী বাই
দেখোন ! সাজি-পাৰিনো ক’লৈ ওলাইছা
? কৰবাত মিতিৰ খাবলৈ যোৱা নেকি ? বোলো তামোল খাই দেখোন মুখখন ফেচুলুকাৰ... [মুখত হোপা দি হাঁহে ৷]
কুঁজী :- হেৰৌ কটা খেকাৰ-খোৱা নাপিত !
বৰ সাহ দেখোন, একা ! এঁ কুঁজী বুলিছ ? বাপেৰৰ ঘৰৰ বেটী পাইছনে, কটা গোলাম ! মাৰৰ
ভমক্ পোৱা নাই হবলা ? দেখিবি মাৰে, কুঁজী কুঁজী নকৰিবি দেই ৷ ৰজাৰ পটেশ্বৰী
বুলিজনা নাই হবলা !
নাপিত :- ঔ আই ! “খেমা’
কৰিবা দেওহে ৷ জানিলেনো আকৌ কওঁনে ? পিছে পটেশ্বৰীনো হলা কেতিয়া ? ৰজাৰ বেটীহে ৷
....
কুঁজী :- কটা বাপেৰৰ বেটী ! ধেমালি
পাইছ হবলা ? মাৰে চৌধপুৰুষৰ সৈতে শালত দিয়াম বুলি জনা নাই হবলা ৷ দে কটা, দে
দাপোনখন সোনকালে ৷
নাপিত :- এ, মই নাজানোঁ নহয় ৷ [দাপোন দিয়ে ] পিছে আমালৈ আকৌ নাপাহৰিবা ৷ চুকে=কোণে
কৰবাত গোজা মাৰি থবা দেই !
কুঁজী :- [দাপোনত মুখ চাই] বাৰু বোপাই! তোক কিবা এটা কৰিম বাৰু ৷ পিছে হমহে, অ’
বুজা নাই ? বাৰু চাচোন চা, মই দেখিবলৈ কেনে হৈছোঁ ৷ ডেকেৰীজনী যেন হোৱা নাইনে ?
নাপিত :- নকবা নকবা, মই বৰ ভাল
দেখিছোঁ ! সঁচাকৈয়ে ষোল বছৰীয়া দীপলিপ্ কইনাজনীহে যেন ৷ মোৰ হলে একেবাৰে মন খাই
গৈছে ....
কুঁজী :- এঁ কটা কুকুৰৰ পুতেক ! তোৰ
ইমানটো কলিজানে ? কটা শৃকালি হৈ সিংহৰ আসৈ পাৱ ? নে কটা তোৰ দাপোন ৷
[দাপোনখন দলি মাৰি দিয়ে ৷]
নাপিত :- [দাপোনখন বুটলি লৈ ] যা যা ফেদেলী বুঢ়ী ! ৰজাই
তোক পটেশ্বৰী পাতিব ! ভয় নকৰিবি দে, মই তোক হৰি নিবলৈ অহা নাই ৷ যা যা মৰতী বুঢ়ী !
ৰজাই ভালকৈ তেল-খাৰণিয়ে গা ধুৱাই লব, যা ৷
[গুচি যায়গৈ ]
কুঁজী :- ইস্ ইস্ ! কটাই গম পোআ নাই
হবলা দেই ৷ বাৰু মাৰে গম পাবি ৷ পিছত ভৰিৰ তলুৱা চেলেকিবলৈ তত্ হেৰাব মাৰে ৷
[এনেতে গণক বাপুৰ আগমন হয় ৷]
কুঁজী :- ই আমাৰ গাধৈ বাপু দেখোন !
পিছে কোন ফালে ? মই আপোনাৰ তালৈ যাওঁহে বুলিছিলোঁ ৷
গণক বাপু :- অহে কুঁজী
বুঢ়ীং ! কিঙ কাৰণাং ?
কুঁজী :- দেউ ! বোলো মোৰ দিনটোকে
গণি-পঢ়ি দিয়কচোন ৷ ৰজাৰ ওচৰলৈ যাব লাগিব ৷
গণক বাপু :- ৰাজ সমীপং
? কিং কাৰণাং, অৰ্থাৎ ৰজাৰ ওচৰলৈ কিয় ?
কুঁজী :- এ দেউ, আপুনি নেজানেই হবলা
আমাৰ উষাই কি কৰিলে ?
গণক বাপু :- উষাং ?
ৰাজকন্যাং ? কিং কৰিলে ?
কুঁজী :- ল’ৰা
এটা আনি অগ্নিগড় সুমুৱাইছেহি ৷
গণক বাপু :- অহ হ হ ৷
ইতি সত্য, ইতি সত্য ৷ আজি মই যোগবলত তাক জানো ৷ যুৱাপুৰুষ নহয় জানো ?
কুঁজী:- হয়, হয় ৷
গণক বাপু :- কটিত
মেখলা যি ধাৰণ কৰে ?
কুঁজী :- হয়, হয় ৷
গণক বাপু :- মাজে
মাজেং যে খোজ কাঢ়ি ফুৰে আৰু মাজে মাজেং যে বহায়মান কৰে ?
কুঁজী :- হয়, দেউ ! হয়, ঠিক ধৰিছে ৷
দেউ ! আপুনি যোগৰ বলত সকলো জানে নহয়নে ?
গণক বাপু :- যথাৰ্থং,
যথাৰ্থং ৷ মোৰ দৰে যোগী এই জগতত নাই: ৷
কুঁজী :-হয় , দেউ ! আপুনি সৰবজান ৷
সেইহে আকৌ আপোনাৰ ওচৰলৈ যাবলৈ ধৰিছিলোঁ ৷ পিছে দেউ ! মোৰ দিনটোনো কেনে গণি-পঢ়ি
দিয়োকচোন ৷
গণক বাপু :- উত্তমং
উত্তমং ৷ [মাটিত বহে আৰু আঁক পাৰে ৷] অহ হ হ, উত্তম দিন ৷ আজিং তোমাৰ কিবা এটা হবই হব: ৷ কিন্তু ৰাহুৰ দোষ আছে
৷ ব্ৰাহ্মণক এটি মুদ্ৰাং দদ্যাৎ ৷ এটি মোহৰ দান কৰিলে খণ্ডনং হব ৷ আৰু বাটত যাওঁতে
ৰাহুৰ নামে এখন তামোল উছগৃতং কৰিব লাগিব ৷
কুঁজী :- কোনো কথা নাই, দেউ !
[মোহৰ এটা উলিয়াই
দিয়ে, আৰু গণকে তাক মেৰতলিত থয় ৷]
গণক বাপু :- বাৰু,
বাৰু ৷ এতিয়া গমো গোবিনং ৷ গোবিন: [যায়গৈ ]
কুঁজী :- এ:, তামোল এখনকে খাই লওঁ ৷ [তামোল খাই চোবাই ] ই তামোলখনে দেখোন গাটো তুলি
দিছে ৷ মাকে, বৰ ৰং লাগিছে আজি ৷ ৰজাৰ পটেশ্বৰী হমেই হম ৷ গাটো দেখোন থৌকি-বাথৌকি
লাগিছে একা ! মাকে পটেশলঝৰীতো হমেই ৷ গীত এফাকিকে গাই, মাকে, পাক এটাকে দিওঁ মাকে
৷
[গীত গাই গাই পাক দিবলৈ ধৰে ৷]
গীত :-
মই
হেনো বুঢ়ী !
[পাৰো] উজুটিতে ওফৰাব ডেকা তিনি কুৰি ৷
এইজনী কোন ? “পূৰ্ণিমাহৰ” জোন ;
মোৰ ৰূপৰ জমক্ চা, চমক্ খাই যা
বৰকৈ নাচাবি বোপাই যাবি উটি-বুৰি ৷
কঁকাল যদিও হেকেৰা,
গাল দুখন পকা থেকেৰা,
কত ডেকাই মোক নিবলৈ ফুৰিছিল ঘূৰি
[দিছিল
কুৰি কুৰি]
কেইটা ৰজাৰ বৰপুতেকে
তলুৱা
চেলেকি গল বাপেকে ৷
তেওঁ জানো মই তাহাঁতলৈ
চাওঁ কেৰাহিকৈ ঘূৰি ৷
[পাক দি দি যায়গৈ ]
(সিপিঠিত)
[ইউনিক’ড ৰূপান্তৰ : দিগন্ত শইকীয়া]
No comments:
Post a Comment