অনুসন্ধান আকাংক্ষাত

Thursday, June 27, 2013

বিদ্ৰোহী কবি প্ৰসন্নলাল






হেৰা বন্ধু !

       হে প্ৰিয় নবীন !

              লোৱা তুলি

                     তুলি লোৱা

                          বিদ্ৰোহ বহ্নিদগ্ধ

                               হৃদয়ৰ মহা অগ্নিবীণ

                               হেৰা বন্ধু বিপ্লৱী প্ৰবীণ !

তুমি সুনিপুণ

       গোৱা গুণগুণ

              দীপক ৰাগিণী,

ডেইপুৰি লৈ যাওক

              অসমৰ আকাশ অৱনী

              নবীনৰ তন্দ্ৰাতুৰ

                          অলস বননি ৷

              কবিতাৰ প্ৰণয়-ফুলনি

              মুক্ত কৰা বিপ্লৱ ধ্বনি

                     বজোৱা, বজোৱা অগ্নিবীণ

                     হেৰা বিদ্ৰোহী নবীণ !

গোৱা মহাতপস্যাৰ

              তেজোদীপ্ত গান,

বিলাসৰ সপোনৰ

জোনাকী কাৰেং য

              চূৰ্ণ কৰি কৰা থানবান,

              গোৱা বন্ধু প্ৰলয়ৰ গান

       মুক্ত কৰা প্ৰচণ্ড ঊৰ্ম্মি সম সুৰ অভিমান ৷

যদি বন্ধু ! নোগোৱাহে গান

যদি বন্ধু কৰা অভিমান

              নিৰ্জীৱ দেশৰ মোৰ

                     কেনেকৈ হব পৰিত্ৰাণ ?





[জ্যোতিপ্ৰসাদ আগৰৱালাদেৱৰ কবিতা]
[ইউনিকড ৰূপান্তৰ : দিগন্ত শইকীয়া]
Post a Comment